Rusiyalı həkim-diyetoloq Aleksey Kovalkov kişilər üçün təhlükəli içkinin adını açıqlayıb. Onun sözlərinə görə,  pivənin müntəzəm istehlakı kişi orqanizmini dəyişir və onu qadın orqanizminə bənzətməyə başlayır.

Tibb.fed.az Rusiya KİV-lərinə istinadla bildirir ki, əksər həkimlər kişilərə köpüklü spirtli içkilərin zərəri barədə mütəmadi olaraq xəbərdarlıqlar edirlər. Artıq çəkidən qurtulmaq istəyənlərə isə bunu şiddətlə tövsiyə olunur.

Pivənin tərkibində olan maddələr kişi orqanizmində testosteronun ifrazını azaldır və əksinə qadın hormonlarının (estrogenlər) ifrazını artırır. Məsələ burasındadır ki, kişi orqanizmində çox az miqdarda olsa da qadın hormonları sintez olunur və bu hormonlar kişinin sağlamlığında vacib rol oynayır. Məsələn, beyinin fəaliyyətinə, qanda şəkərin səviyyəsinə təsir edir, sümükləri daha möhkəm edir, prostat vəzi xəstəliklərindən və o cümlədən prostat vəzi xərçəngindən qoruyur və s. Lakin kişi orqanizmində qadın hormonlarının ifrazı artanda bu hormonal və s. pozulmalara səbəb olur. Yeri gəlmişkən qadın orqanizmində də az miqdarda əsas kişi hormonu olan testosteron sintez olunur. 

“Pivənin tərkibində fitoestrogenlər (hormonabənzər maddələr – red.) var. Onların təsirindən testosteronun səviyyəsi azalır, sonsuzluq, impotensiya inkişaf edə bilər. Bu səbəbdən bütün diyetoloqlar kişilərə qəti şəkildə pivə içməyi  tövsiyə etmirlər”, - Kovalkov bildirib.

Həmçinin həkim qeyd edib ki, burada pivənin miqdarı – bir və ya 10 butulka rol oynamır. Əsas təhlükə bu içkinin müntəzəm qəbulundadır.